Gen 32 | MEU | STEP | Iakob na ena dala ai ela, bena Dirava ena aneru loḡora ida e hedavari.

Genesis 32

Iakob ladana e ha-idaua

1 Iakob na ena dala ai ela, bena Dirava ena aneru loḡora ida e hedavari. 2 Iakob ese e itadia, bena eto, Ina na Dirava ena tuari oreana: taunabunai una gabu ladana e hatoa Mahanaim. ^{▼▼“Mahanaim” anina be “Tuari oreadia”.}

3 Una negana ai Iakob ese ena hesiai taudia e siaidia guna, kakana Esau dekena baela, Seiri tanona ai: Edom ena tano bunai. 4 E haduadia, eto, Egu lohia Esau ini ba hamaoroa toma, baoto “Emu hesiai tauna Iakob na e tomu: lau na Laban ida vada na noho ema bona hari; 5 lau na mai egu boromakau bona doniki bona mamoe bona nani bona hesiai taudia bona hesiai hahinedia; bena ihamaorolaimu herevana egu lohia emu ai name siaia vasi, oi vairamu ai hebogahisi baina davaria totona”.

6 Hesiai taudia na e lou ema, eto, Ai na kakamu Esau ida a hedavari, ia na dekemu e maimu, ena orea taudia sinahu-hani ida. 7 Bena Iakob na e gari dikadika, kudouna e hetaha. Bena ena orea taudia bona ena mamoe, ena nani, ena boromakau, ena kamelo danu, orea rua ai e hididia. 8 eto, Esau ese orea ta baine davaria bena baine habuaia tari reana, a orea ta ma baine mauri.

9 Bena Iakob e ḡuriḡuri, eto, Tubugu Abraham ena Dirava, tamagu Isaak ena Dirava, Iehova e, oi ese o haduagu, oto “Emu tano ba lou henia, varavaramu dekedia baola, bena baina hanamomu”. 10 Emu hebogahisi karadia iboudiai emu hesiai tauna egu ai o kara, bona emu gwau-hamata herevadia emu hesiai tauna egu ai o hamomokani, lau na dia heḡereḡere; badina be imagu mai itotohina mo ina Ioridane sinavaina na hanai nala, a harihari mai orea rua ida vada na lou mai. 11 Na noimumu, kakagu Esau imana amo ba hamaurigu; badina be na garimu, ia na bainema, baine tuari henigu, natugu mai sinadia ida baine aladia mase. 12 A oi vada oto “Momokani, lau ese baina hanamomu, bona garamu baina hahutumadia kone mirina na heto, asi iduahidia”.

13 Una hanuaboi ia na unuseni ai e taruha; bena ena kohu amo herahia gaudia e abi, kakana Esau ena. 14 Gaudia bini: nani hahinedia sinahu-ruabona nani mamaruanedia ruahui; mamoe hahinedia sinahu-rua bona mamoe mamaruanedia ruahui; 15 kamelo toi-ahui mai natudia ida; boromakau hahinedia hari-ahui; boromakau mamaruanedia gwauta; doniki ruahui; bona doniki natudia gwauta. 16 Ini iboudiai ena hesiai taudia e henidia, ta ta ena seri ena seri ai. Bena ia ese ena hesiai taudia e hamaorodia, eto, Umui ba raka guna, seri ta ta mai padadia ida ba hakaudia lao. 17 Bena baine raka guna tauna e haduaia, eto, Kakagu Esau ida ba hedavari negana ai, ia baine henanadai, baineto “Oi na daika ena hesiai tauna? Ede bo laomu? Ina seri be daika ena?” 18 Bena oi ese ba haere henia, baoto “Ini na emu hesiai tauna Iakob ena, ena herahia ḡaudia lohia taumu Esau emu; ia danu murimai ai e maimu”. 19 Ihararuana danu unu e haduaia toma, bona ihatatoina, bona idia muridiai seri ta ta bae hakaudia taudia, hahedua tamona e henidia, eto, Esau ida ba hedavari negana ai ini ba hereva henia toma. 20 Ma baoto “Emu hesiai tauna Iakob na murimai ai e maimu”. Ia na lalona ai eto: Egu herahia ḡaudia amo ena badu baina laoa ahu guna, gabeai ia vairanai baina hedinarai negana ai reana baine abigu dae. 21 Taunabunai, unu hesiai taudia ese herahia ḡaudia e gunalai, a Iakob na una hanuaboi taruha ai e noho, ena orea taudia ida.

22 Malokihi ai e tore isi, adavana raruosi bona ena hesiai hahinedia raruosi bona natuna mamaruanedia gwauta-ta-osi e abidia, sinavai maraḡina ladana Iabok bae turu hanai. 23 Ia ese e abidia, e siaidia hanai, ena kohu idoinai danu e hanailai. 24 A Iakob na sibona noho, bena tau ta na ia ida e hedaverai ela bona daba e kinia. 25 Hari tau na dibana ia na basine kwalimu diba, bena ia ese Iakob mamuna varovarona e daua toho; taunabunai Iakob aena e heride, ia na hari tau ida e hedaverai negana ai. 26 Bena hari tau eto, A kahugu nege, badina be daba vada e kinia. A Iakob eto, Lau na basina kahumu nege ela bona oi ese ba hanamogu. 27 Bena hari tau eto, Oi ladamu be daika? Ia na e haere, eto, Ladagu na Iakob. 28 Hari tau ma eto, Harihari ela oi ladamu na dia Iakob; oi ladamu na Israel, ^{▼▼“Israel” anina be “Dirava ida e goada helulu”.} badina be Dirava ida vada o goada helulu bona taunimanima ida danu, bona vada o kwalimu. 29 Bena Iakob ese e nanadaia, eto, Mani emu kara, oi ladamu ba hadibagu. Hari tau elo, Badina be dahaka lau ladagu o henanadailaiamu? Bena ia ese e hanamoa. 30 Bena Iakob ese una gabu ladana e hatoa Peniel; ^{▼▼“Peniel” anina be “Dirava Vairana”.} eto, Dirava vada na itaia, raruosi vada ame hegaga heheni, to vada na maurimu. 31 Bena Penuel e rakaia hanai ai daba e rere, ia na aena e heride. 32 Badina bunai Israel besena taudia na mamu varovarodia asie animu ema bona harihari: badina be Iakob mamuna varovarona e daua toho bena aena e heride.